من ضمن قريت في مرة عرفت ان في حاجة اسمها ثقافة رسمية و ثقافة شعبية و فهمت ان في ارادة رسمية و ارادة شعبية و ان في للامور نظرتين واحدة رسمية و واحدة تانية شعبية و ان مش شرط دايما ً او غالبا ً أو ابدا ً ان اللي المعارضة بتعارض بيه باسم الشعب هو اللي في الحقيقة الشعب عاوزه فعلا . يعني ايه الكلام ده ؟ يعني بكل بساطة اننا مش حنفهم البلد ماشية ازاي او حيكون ايه مستقبلها غير لما ننزل بجد للشعب ده و نفهم هو بيفكر ازاي يعني نسيبه يتكلم علي راحته و راحة راحته و راحة راحة راحته كمان عشان منه نتعلم .
متستغربش أوي كدة . يا مثقف يا عالم يا عليم يا مغرور ياللي قاعد فوق علي كرسي عاجي قاعد بتردد مجرد كلام نظري و بس و ان شرط ان يحصل كدة ان لازم و حتما ً و لابد يحصل كدة . تصدق بقي و تآمن بالذي خلقك ان مفيش شروط ملزمة حاكمة ان كذا لازم يحصل بعد منه كذا ممكن اوي تظهر نتيجة جديدة لاي فعل انتا متوقع له حاجة تانية
المهم مش حنطول اوي في النظرية اللي اكتشفتها دي و حندخل علي طول في الموضوع
انهاردة كنت قاعد مع صاحبي الحلاق و دخل علينا زبون معاه دبلوووون تجارة - دبلوم تجارة يعني - المهم الراجل ده قعد يتكلم عن اوضاع البلد السياسية و الاقتصادية و الاجتماعية و لا اجدعها خبير او باحث و بيربط نتايجه بادلة منطقية و مقنعة
الراجل ده يا جماعة لفت نظري لخفايا كتيرة جدا و هدم عندي حاجات كنت مـعتقد في صحتها .. مش حطول عليكم عشان انا منمتش من امبارح كويس .. و حاقلكم دلوقتي اهم حاجة الراجل ده نبهني ليها ...
و هو بيتكلم و منجلي جاب سيرة التوريث .. قال ايه عم الحاج بقي
انه يا ريت جمال مبارك يكون هو الرئيس بعد ابوه . قلت له ليه يا عم هي عزبة ابوه الراجل الصالح الطاهر ابوه
قال الحكاية مش كدة الحكاية ان احنا مش عاوزين اللي يحكمنا الفترة اللي جاية دي حاكم يكون عادل او كويس
المهم نشوف اكل عيشنا
قلت له : اومال عاوزين ايه هو احنا ناقصين ؟
رد عليا قالي بص البلد زي ما انت شايف مفيهاش فلوس و بقت ع الحميــــــــــد المجيــــــــــــد
و البلد فلوسهـــــا برة
و المستثمرين الكبار بيهربوا منها
و قلة هي اللي محتكرة الاسواق
و القلة محمية في حــُضن السـُلطة
و لو مسك حد من برة المجموعة دي بعد مبارك
حبة الفلوس اللي في البلد حتطيــــــر
و الحالة حتبقي كرب اكتر ما هــــي مكروبــــة
و قالي النكتة دي
واحد بتاع بطاطا معلق صور : عبد الناصر و السادات و حسني و ولده جمال
فواحد سأله : يا عم انت ليه حاطط معاهم صورة جمال مبارك ؟
بتاع البطاطا رد و قال : اصل ده شريكي علي العربية
يعني ايه شريكه علي العربية ؟
يعني هو و اخوه ماسكين اقتصاد البلد كله في ايدهم و لو حصل لهم حاجة او محكموش حيهدوا المعبد فوق روس الجميع
هكذا يـفكر المصريون قرائي الاعزاء في مسألة التوريث
فعلا ً الفقر مذلة ليس بعدها مذلة
هناك تعليقان (٢):
الراجل ده كلامه صح بجد
ويقولك يا عم اسلام الناس مش فاهمة و مش عارفة مصلحتها فين .. و الناس فاهمة و عارفة اللي فيها
إرسال تعليق