بسم الله الرحمن الرحيمربي لاتكلني إلى نفسي طرفة عين وأجعل القرآن ربيع قلبي وعقلي وسنة نبيك محمد نور دنياي ..
النهاردة يوم هيتسجل ف التاريخ بالنسبة ليا لاني هقدم برنامج عن الشباب من شاب زيكم بيحس بيكم وبهمومكم وبيعيش نفس التجارب هو مش ملاك زي مانتم فاكرين هو بشر ومن كان مناَ بلا خطيئة فليرمها بحجر وانا لاأملك هذا الحجر بل هي التي رمتني بأحجارها ،واجهت غلط كتير: واجهت نفسي ومرة واجهت الشيطان ومرة واجهت الباطل عشت ف صراعات كتيرة وبردو انا زي زيكم ويمكن أقل منكم ..نسيبنا من دا كله وندخل في صميم موضوع حلقتنا واللي بشوفه البداية الحقيقية للبرنامج اللي فكرتله انه يكون زي اي حاجة ف الدنيا بتبدي بأطوار قليلة ثم اكبر فأكبر لغاية ماتنفجر بس مش ف وشكم طبعا
.
-1-
(1)هنتكلم عن احنا ايه في البيت وبنمثل ايه بالنسبة لبابا وماما (بابي ومامي /أبويا وامي/ الحاج والحاجة /داد آند مام) المهم انهم اتنين وخلاص ..اول ماتولدنا وخرجنا للنور الزغاريد ملت البيت والجيران جم يهنوا ولو كنت انت تالت ولد ييجي على التوالي ممكن أهلك يسموك إسم بنت زي سلوى او فتكات عشان الحسد والناس تقول يالهوي 3 دكرة في بيت واحد ..تفكير متخلف ولو طلعتي تالت بنت يكشر عن أنياب غضبه ويهرب من مواجهة مراته ماعدا في حالة جماع آخر بين الزوجين عشان يجيب الولد اللي بيحلم بيه ..ويعملولك سبوع وأعياد ميلاد وخروجات ليل ونهارمرة للسندباد ومرة لجنينة الفسطاط اه طبعا ماهو جيلنا ماكنش فيه ايامه دريم بارك ولا حديقة الازهر ..وتدخل على ايام الاعدادية بقى وسيادتك جايب شعرك على جنب بشويتين مية عاملي فيها عماد حمدي ومسرحه بمشت من ابو 15 قرش اه ماهو ماكنش فيه لاجيل ولا الفرشة السلك أيام بقى ..امك تقولك احجز درس عند ابلة علية بتاعت حساب وعربي ودراسات وانجليزي وعلوم وخط كمان يلا محدش واخد منها حاجة وتقابل البت ناهد في الدرس وعاملالك شعرها كله ضفاير وشها مش باين من كتر الضفاير- وانت مسهوك ياخويا مرة واحدة ميس علية تقولك خمس تفاحات عاوزين نوزعهم على 3 كل واحد هياخد كام ؟- كل واحد هياخد واحد ونص برتقالة - برتقالة جبتها منين احنا ف سوق العبور هنا ياواد (وتنزل بالمسطرة الخشب ام 30 سم وعلى ضوافرك اللي مش نضيفة كالعادة )..وتيجي البت ناهد زعلانة ياعيني عليك وعمالة تقرقض ف ضوافرها وتلعب ف ضفايرها هايمة ولهانة ..اتفوا عليكم الاتنين عاوزين الحرق ..ندخل على الثانوية العامة ههههههههههههههههههههههههههههههاولى ثانوي يالهوي على دي سنة العيال بيعلموا نفسهم وناسيين ان في مدرسة ومدرسين وكل واحد وخبرته ف الحياة اللي مابتخرجش عن اطار الجنس والشتايم القذرة والبت الي معلقها من مدرسة الخديوي اسماعيل الثانوية بنات ..وتلاقي كل واحد سايب استاذ بطرس بتاع الكيميا الغلبان ياعيني يشرح ومالي السبورة معادلات وبيتحدوا بعض في ايه تخيل معايا كدا ..كل واحد يقول للتاني انا والله بعرف اعمل اللي بالي بالك 5 مرات في اليوم ..- يمين بالله انا بعرف اعملها خمس مرات ورا بعض من غير ماتعب او اريح ..يانهار اسود ع الكلام شوفوا بيتحدوا بعض على ايه والله العظيم حصلت معايا ف المدرسة يعني ولا حياء ولا دين ولا اخلاق والكارثة انهم اجروا التحدي ف الفصل قدامي والله العظيم يخرب بيوتهم ..عرفتوا ليه مصر مليانة بشر ..هههههههههههههههههههههههههههههندخل على تانية وتالتة علمي ولا ادبي يابابا علمي يبني هتدخل هندسة ان شاء الله يارب اشوفك كدا شايل المسطرة الروترينج (وابقى قابلني لو طلبت منه حقها واشترهالك)..وطول السنتين ذاكر يبني ذاكر الله يخرب بيتك روح درس الكيميا روح درس العربي ماتنساش استاذ اسماعيل زكي بتاع الرياضيات وانت ياعيني مضروب بالجزمة شايف اخواتك اللي ف كلية متهنيين واللي ف اعدادي ونازل رايقين (ياريتني كنت معاهم على طريقة فيلم الطريق الى ايلات ) ..وتخرج من الثانوية العامة انسان غريب والله لو دخلت طب بردو غريب ومنطوي والناس مستغربة انت عامل كدا ليه ومش بتعرف تجمع كلمتين على بعض ومفيش اي صلة بين وبينك الحياة انت صلتك بالتعليم وبس ناجح في التعليم فاشل في الحياة ..ولو دخلت تجارة ولا حقوق هتدخلها فارد دراعاتك وواثق من نفسك وتعمل اشياء كارثية وتحب روميساء اللي ف كلية الآداب(محدش يفهمني غلط ..هههههههههه)وتخرجوا مع بعض وتروحوا الفسطاط او الميرديان وليكم مكان مخصوص هناك والراجل بتاع الشاي يرخم عليك عشان تقبضه فلوس ويسيبك براحتك او ربنا يوعدك بعسكري قال ايه عشان الحفاظ على المكان العام من البلاوي الي بتحصل فيه ياخدله قرشين بعد ماكان شايفك بتبوس حبيبتك وبيقولك هعملك محضر ويسكت بعد مايقبض ويتكل على الله ويسيبك هو دا النظام الصح الله الله يابلد ..نصحى الصبح ندب خناقة مع ابونا عشان الفلوس اللي مش راضي يديهالنا ونمشي على الكلية اللي مش بنحضرها اصلا اما اننا نروح مع زمايلنا ونشرب اي حاجة او مع البت حبيبة قلبه اللي وعدها بالزواج اول مايخلص تعليم ويبقى راجل اد الدنيا كمان ..وتتنازله عن حاجات كتير في سبيل انه زوجها في يوم ما قادم ..هنستغفر ربنا على البلاوي دي ونتوب ودقننا تكبر اوي اوي ونمشي نشوت ونلعن كل إمرأة ماهي بقت شيطان على هيئة انسان وكل مافيها محرم ولايجب التقرب من وسواسها ..ونوعظ الناس بالعصا والجزرة والناس تهللنا وتقول الله ونعم التقوى ونكبر ونكبروتكبر احلامنا العكسية اللي ظهرت مرة واحدة على السطح ..ممكن نرجع تاني ونحلق الدقن ونغير الجلابية القصيرة بت شيرت بادي وجينز متسقط عادي جدا وكنت بشوفها ف الكلية والله وكنت بشوف واحدة زميلتي الله يهديها يوم بنقاب ويوم بالجينز والبادي النص كم واليوم اللي بعديه خمار واللي بعديه بلوزة وجيبة واللي بعديه إسدال ..ههههههههههههههههههههههههولسة بنلف ف الدواير وتايهين طب والعمل ..وبكدا خلصت فقرتنا الاولى وهكملها في الفقرة الاولى من الحلقة القادمة ومعانا الحلول المقترحة ان شاء الله ..الفقرة التانية بقى
-2- ً
هنستضيف استاذ محمد مجدي وهو خريج اداب جامعة الاسكندرية كان مدير يوماً ما وهو لم يكمل عامه الثاني بعد العشرين شخصية قيادية جريئة ثورية واجهت مشاكل كتير اخرها ان بعض زملاء الكورس بتاعه كفروه -استغفر الله- اي والله ربنا يسامحهم بقى ..؟
في البداية احب ارحب بيك يامحمد يامجدي وانا بعتز بيك من الناحية الشخصية ويارب تكون لمست دا
لمست دا ..في البداية احب اتكلم معاك عن صباك وصغرك ..؟
في الأول أحب أوجه التحية لجميع أعضاء منتدي شبابيك – الرائع فعلا ً بكل المقاييس ، و اللي باعتز بيه جدا ً و باعتبره نواة لشئ مهم و مؤثر قادم في الطريق بكل قوة . و بالطبع بأشكرك علي ثقتك فيا ، و أني أكون ضيفك في أولي حلقات برناج حركات شباب . و فعلا ً القلوب عند بعضها لاني باعتز جدا ً بيك و أحب أهنيك انت و محمد بربر و سمر سيد – بنت مصر – علي التأهل لنهائي اكاديمة شبابيك التالتة . فعلا
و يلا نبتدي كلامنا عن صبايا و صغري
وانت صغير ايه هو اقبح إثم ارتكبته ومحدش عرفه غيرك وكنت حاسس انك عاوز تدفن نفسك بعدها ؟
هي الاسئلة من بدايتها كدة . يا عم انا كنت صغير يعني مفيش عليا حرج . و احنا صغيرين بنعمل اي حاجة و كأنها هي الشئ الطبيعي عشان كدة الحمد لله مكنتش عاوز أدفن نفسي لأني أعتقد اني معملتش آثام ساعتها إلا إذا كنت بوست زميلة ليا في الابتدائي . بوسة اخوية طبعا
إحساسك بالذنب بيوصلك لانهي درجة يامجدي انك تجلد نفسك وذاتك طول الوقت ولا بتعمل ايه بالظبط ؟
أنا قد أكون بجلد نفسي طول الوقت و ده لأني بأسعي دايما ً لتطوير نفسي و معني الاحساس بالذنب عندي مش شرط اني اكون عملت شئ شنيع . بل هو مستويات مختلفة فانا قد آمل في الوصول لدرجة معينة في شئ ما و يخيب ظني فأراجع نفسي كثيرا ً حتي أصل للحل الذي يرضيني و يجعلني أكثر قوة عن ذي قبل
افتكرلنا مرة كدا كرهت فيها نفسك ومع ذلك وصلت معها لحل وتصالحت معاها ؟
.انا لا أكره نفسي . لكن ممكن تقول : بأزعل ساعات من نفسي . و المرات دي كتيرة متعدش . منها مثلا ُ أني في فترة من حياتي وقعت تحت تأثير واحد نصاب . و تقريبا ً كنت لاغي عقلي . لكني فقت مرة واحدة و راجعت نفسي و من ساعتها قررت أني مصدقش أي حاجة و لا أثق في أي أحد بسهولة إلا بعد ما أفكر تمام التفكير بعقلي و الحكاية دي أعتقد انها ساعدتني كتير علي اني اعرف ازاي يكون لي تفكير مستقل و رأي مستقل . فشكرا ُ ألف شكر لهذا النصاب
مرة والدك عارضك فيها وانت اقنعته برأيك بالرغم انه كان رافض وبشدة ؟
كتير جدا ً متعدش . مشكلتي مع والدي اننا احنا الاتنين عنديين . و اننا اسلوبين مختلفين تماما ً في التفكير . حاجة كدة عاملة زي الاقتصاد الموجه و الاقتصاد الحر في صورتهم الاصيلة . هو دايما ً عاوز يخطط لي حياتي بالورقة و القلم و انا عاوز اخططها بالشكل اللي انا عاوزه . من المرات دي إنضمامي لحزب الغد . كان معارض له و بشدة ، و لمدة طويلة . لكنه علي الرغم من عدم إعترافه بكدة رسميا ً : كان مستجدعني . هو رفضه في موضوع زي ده كان بسبب خوفه عليا و ده شئ طبعا انا احترمه
في الثانوية العامة ايه اكتر حاجة كرهتها؟
طول مدة الدراسة . و المناهج العقيمة اللي كلها حفظ و بس . كأن معندناش عقل . و طبعا ً أساليب بعض المدرسين في التعامل مع الطلبة و هي أساليب تنتمي للمدرسة الشمولية اللي بتحكم حياتنا في مصر كلها لسة . لكن انا كنت باعمل اللي انا عاوزه غير مبالي باي تخويفات او تحذيرات و الحمد لله دخلت الكلية اللي كنت باتمناها و باكتر من المجموع المطلوب . رغم اعتراضي اصلا ً علي فكرة التنسيق بالشكل اللي بتتم بيه
ايه اللي كان حلو زمان ونفسك ترجعله؟
لمة صحابي . و لعب الكورة . اتفرقنا بسبب ضغوط الحياة و كل واحد ابتدا خلاص رحلته في رسم خريطة حياته كما يتمناها أو ربما كما تمليها عليه الظروف .
بالنسبة للكريمة والدتك تفتكر علمتك ايه حلو فيك وهل بتحبها اكتر من والدك ولا لأ ولماذا ؟
أهم شئ علمتهولي . حب الانسان مهما كان إختلافه . شئ علمتهولي بعفوية شديدة بعيدا ً عن اسلوب التنظير و الخطابة . علمتهولي عن طريق ظرف واقعي حصل بطريقة رسخت في وجداني معني عميق جدا ً و هو ان الفعل هو الشئ اللي بيدل علي سلوكك و ليس مجرد الكلام بانك كويس و فيك كل اللي ما يتقال غير في الملايكة . ايه بقي اللي علمتهولي ده . و انا في ابتدائي كان لي صديق مسيحي مكناش بنفارق بعض ابدا ً . حصلت ظروف و غبت عن بيتي لمدة شهر و نص تقريبا ً و رجعت تاني بعض الاصحاب حاولوا يوقعي بيني و بينه و نقلوا لي كلام انه بيشتم عليا و اني عشان اخد حقي منه استخدم الفاظ معينة ضده . الفاظ عنصرية تحتقر من دينه . و للاسف وقعت في براثن هؤلاء الاوغاد . عرفت والدتي بالموضوع و عنفتني بشدة و قالت لي ايه مسلم و ايه مسيحي و لا يهودي حتي . هو متربي عنك و احسن منك و من صحابك دول . روح اعتذر له . من ساعتها و انا باحاول تكون نظرتي للاخر ليس علي انه اخر و لكن علي انه اولا ً و اخيرا ً انسان .
في البداية كنت احب امي اكثر من ابي . و لما كبرت و فهمت الفرق بين دور الام و دور الاب باحب الاتنين بنفس الدرجة
جميل عمرك ماهتنساه لبابا وماما طول عمرك؟
اكيد ليهم جمايل كتير عليا . جمايل كانت و جمايل لسة بعيشهها في الحاضر و اكيد جمايل تانية جاية في المستقبل . و كفاية انهم سبب في وجودي معاك دلوقتي عشان اراذيكم .
كنت بتحلم بايه وانت صغير واكتشفت انه هبل ووهم لما كبرت ؟
يا عم أحمد . لو بطلنا نحلم نموت . كل مرحلة و ليها احلامها . و ده شئ طبيعي فيها فما يصحش اني احاكم حلم في فترة الطفولة . لان بالعكس احلام فترة الطفولة قد تكون سبب في تغيير مسار حياة الانسان فيما بعد .
. انا الحلم اللي بيضحكني كل ما افتكره هو اني كنت عاوز اطير زي بن فرناس و بالفعل و انا صغير حاولت اطير . كنت باعلق حبلين متوازيين علي مستوي مرتفع و احط عليه – شلتة – و اتخيل نفسي بأطير . انا دلوقتي اعتقد اني بحاول احقق نفس الحلم لكن بطريقة مختلفة بالتأكيد أكثر واقعية .
هل في حاجة حلمت بيها وانت صغير وحققتها لما كبرت(مع انه صعب ) ؟
عشان اكون واقعي لسة طبعا ً. و ان كنت في طريقي لكدة باذن الله .
هناك اشياء حدثت و تحدث معي اعدها مبشرات لامكانية و واقعية مطلبي في تحقيق احلامي . منها اني كنت احظي بتقدير و ثقة عدد من اهم قيادات حزب الغد بالاسكندرية حين كنت عضوا فيه . و منها إيمان معلمي الاكبر الذي افتقده منذ فترة طويلة – و أسأل الله أن يكون بكل خير – استاذي و اخي / عمار البغدادي بموهبتي و ما ينقله لي زميلي العزيز عماد رفعت من كلمات اشادة من كبار كتاب مجلتنا شبابيك . د/ الباهي جاد . د/ ياسر العدل . الروائي المغربي / محمد لمسوني . و الكاتب المميز / اسلام ابو خليل . و الكاتبة المغربية / صباح الشرقي صاحبة الاراء التقدمية ، و غيرهم . الحمد لله
ايه اللي حصل وقلب حياتك وكيانك مرة واحدةوماكنتش تتوقعه ؟
دخولي حزب الغد كان من اهم نقاط التحول في حياتي . هناك عرفت حاجات كتير و احتكيت بتيارات مختلفة . و عرفت معني كلمة الصراع و كيف هو عندنا ينتهي الي دمار و ضياع و عند غيرنا ينتهي بنجاح . عرفت حقيقة السياسة في مصر . و ان ما يحدث في مصر ليس سياسة و إنما هو شئ آخر بعيد عن السياسة . من هناك تنبئت بمستقبل البلد ككل و يمكن تلخيصه في " ربنا يستر "
كلنا حبينا وهمنا على وجوهنا وإحتكت قلوبنابالحب احتكاك جلد الثعبان الناعم برمال الصحراء الساخنة ..امتى قلت ان الحب دا وهم و مجرد تجربة راحلة؟
الحب هو المحصلة النهائية لكل ما يتصارع من أجله البشر . فإذا كان هناك أي كلام عن تخيل مدينة فضيلة فالمقصود منه مدينة : السلام و اللا أحقاد .
و الحب موجود لا يستطيع أحد أيا ً كان إنكاره . هو غريزة طبيعية عند كل المخلوقات . لكن أحيانا ً نشعر بأنه غير موجود أو أنه كان زمان و انتهي الآن بسبب تسارع ايقاع الحياة و وضوح الجانب المادي و تغطيته علي الجوانب الاخري . و الحب بمعناه البسيط بين الذكر و الانثي .جزء من هذه المعادلة . تنطبق عليه نفس شروطها . و في بعض الاحيان كدت افقد ايماني في وجوده و انه اصبح مجرد سلعة تنطبق عليها معايير السوق . و في لحظة ما عقب التخرج ، كانت حياتي لمدة مش قصيرة ، غير ثابتة و غير مستقرة باختصار فترة من أحلك فترات حياتي شكيت فيها في حقيقة الحب و زاد و غطي عليا فيلم – العشق و الهوي – اللي طرح عليا اسئلة كتيرة منها :
هل يوجد حب ام عِشرة ؟ هل الحب يحدث لمجرد الرغبة في الامتلاك ؟ اذن الواقع يقول لا حب و انما تعود . و اعود لاقول لا الحب موجود بس لانه غالي جدا ً فصعب العثور عليه بسهولة .
سؤال اخير انت عاوز ايه من الدنيا والدنيا عاوزة منك ايه ؟
انا مش عاوز من الدنيا غير انها تحاول تحقق علي أد ما تقدر جزء كبير من مطالب البشر في المطلقات الآتية : الحق . و الحرية . و السلام . و الخير
و الدنيا عاوزة مني و من غيري إننا نكافح و نجاهد عشان نقف بكل أمان علي حدود المدينة الفاضلة
أسئلة الجمهور
عماد رفعت
اهلا بيك يامحمد مجدي نجم اكاديمية شبابيك الثانيه
اولا تفتكر ازاي الاكاديمية الاولي اللي حصلت فيها علي المركز الثاني وتفتكرازاي الاكاديمية الثانيه اللي حصلت عليها علي اللقب وايه يمثل لك لقب"نجم اكاديمة شبابيك الثانيه"
ايه رايك في اكاديمة شبابيك الثالثه؟
إزيك يا عمدة . أفتكرهم بكل خير طبعا ً . الأكاديمة صاحبة فضل عليا لا يمكن إنكاره و لولاها مكنتش باكتب بصفة مستمرة في شبابيك الاسبوعية و لا كنت احتكيت بناس مميزة كتير و بالطبع مكنتش ابقي ضيف الحلقة الاولي من حركات شباب
الاكاديمية الاولي دخلتها و انا في البداية قلق من اني حخرج في الاسابيع الاولي و لكن مع الاسبوع الثالث فيها بالتحديد قلت انا لازم اوصل للنهائي و بالفعل وصلت للنهائي و خسرت بفرق صوت عن زميلي العزيز / حسن يوسف .
الاكاديمة التانية دخلتها من الاسبوع الاول و انا لي هدف واحد و بس اني اكسبها بالرغم من اشتداد المنافسة فيها عن الاكاديمية الاولي بشكل كبير . و الحمد لله حققت هدفي و توجت باللقب رغم ان كان في تكتلات ضدي من البعض لكن في النهاية الجمهور قال كلمته . لم يخذلني لاني راهنت عليه و كتبت لاجله اولا ً مع ان في داخلي كنت اريد التتويج لي
اكاديمية شبابيك التالتة . تخطت مرحلة المراهقة و خطت خطوات واسعة نحو النضج . غالبية المشاركين كانوا بالفعل يستحقوا اللقب حتي من الناس اللي انسحبت . او الناس اللي خارج قائمة العشرة الاوائل .
وايه رايك في النجوم اللي وصلوا للمرحله النهائيه "احمد زكريا وبنت مصر ومحمدبربر"؟
حقول ايه نجوم فعلا ً . و هما بدون اللقب مميزين و مميزين فكريا ً ، و كل واحد منهم له حلم كبير يسعي لتحقيقه ، لكن الفارق الجوهري بينهم و بين غيرهم ، انهم بالفعل يملكون آليات تحقيق الهدف ده ، و إن كان مختلف عند كل منهم .
وتنصح نجم الاكاديمة الجديد بأيه عشان يستغل نجاحه ويكون اللقب فعلا مثمر ومشعدي مرور الكرام؟
إنه ينسي اللقب من تاني يوم يتوج فيه . و أنه كان ممكن جدا ً ميتوجشي بيه . و أن يهتم بكل ما ينفع الناس و يبحث عن مناطق جديدة أو مش واخدة حقها في الكتابة . و يكتب عنها
ونجم الاكاديمة هل بيظهر اثناء الاكاديمة ام النجوميه الحقيقيه بتظهر بعدانتهاء الاكاديمية؟
ليس هناك شرط محدد للنجومية فقد تظهر هذه النجومية أثناء الأكاديمة و قد تظهر بعدها و قد تظهر قبل الاكاديمية – و هي الحالة اللي بتبان اوي في حالة ثلاثي نهائي الاكاديمية التالتة علي وجه التحديد . و اعتقد ان ال 3 حالات ظهروا خلال 3 سنين اكاديمية
كل سنه وانت طيب ومحترم يامحمد مجدي من النجوم الخلوقين كتابه وفكروأخلاقودي اساس الاكاديمية مش قلم بس وانما اخلاق بتأهله يبقي حاملاللقب.
شكرا جدا ً يا عماد . و انت من الناس اللي بحترمهم جدا
yoka
أهلا أهلا مجدىالاول بشكر أستاذ أحمد زكريا على البرنامج كتير مميز
أرجع بقى تانى لمحمد مجدى نجم الاكادمية 2منور طبعا ؟
الله يخليكي . انتي اللي منورة
اول حاجة نفسى اعرفها : إيه حكاية عثل عثل ؟
عثل و لا تفصدي بث بث . عموما الاتنين خطوط حمرا لا يجوز تجاوزها
ايه هو شعارك و هدفك فى حياتك؟
شعاري هو : لا تكن إمعة .
و هدفي : أن يكون لي شرف التغيير في فكر الناس للتخلص من كل ما هو معرقل للقيم الرفيعة و علي رأسها الحرية و التسامح لأنهم بداية الطريق نحو النهضة و التقدم
اغرب موقف مريت بيه؟
اخر موقف غريب مريت بيه . هو تكفيري الاسبوع الفائت . و ان كنت بعدها لم استغرب هذا وسط حالة الجهل و التخلف و ادعاء التدين السائدة الآن
حاجة عملتها ندمت عليها؟
مش باندم علي حاجة .لان الندم افهم معناه انه احتجاج علي ما حدث و كل ما حدث هو خير للانسان سواء ارضاه ام لم يرضه . و انما هو زعل او حزن . و اكتر شئ زعلني اني مرة كنت سبب بكاء انسانة طيبة .
حاجة عملتها حاسس انها اصح حاجة عملتها فى حياتك؟
قراري عدم الاستمرار في عملي في ليبيا منذ عامين حين حاول صاحب العمل الليبي أن يلي ذراعي بشكل قد يحط من كرامتي لاجل المال
و رفضت رغم نصائح زمائلي المصريين – للاسف – بأن أقبل بهذا الأمر لأن الحياة عاوزة كدة
من ساعتها عرفت أن للمصري جزء كبير جدا ً في احتقاره خارجيا
مين هو مثلك الاعلى؟
ليس لي مثل أعلي محدد . بل أني أجد في كل ناجح مثل أعلي لي
و ذلك لسبب بسيط و هو أن النجاح – في رأيي – ليس له طريق واحد بل طرق عدة . قد يكون له اساسيات معينة . و لكن ليس له ابدا طريق واحد .
و بالتالي فتحديدي لنموذج وحيد احتذيه مثلا ً اعلي قد يقع بي في دائرة التقليد فأكون مجرد نسخة رديئة منه . و هو ما لا اسعي اليه . و لا احبه . فانا مع نزار قباني حين يقول : أنا لا أشبه إلا أنا .
سووم
ازيك الاول يا مجدى واخبارك ايه
اية هو الهدف الى عايش علشان تحاول تغير بية الكون او مصر علىالاقل؟
أهلا يا سووم . الهدف اللي انا عايش عشانه . هو أن نكون أمة متحضرة و متقدمة و حرة ، تؤمن بالحريات العامة ، و أن يكون الناس أكثر تسامحا ً في تقبل المخالف لهم أو المختلف عنهم . أمة تشجع التعدد و التنوع .لا أمة تريد من كل الناس أن يكونوا قالب واحد ، لأن الإختلاف و التنوع هما اللذان يساعدان علي روح الإبتكار و الإبداع .
أحمد عمر
محمد مجدى نجم شبابيك 2 اهلا بيك..سؤالى ليكم:..و ان كنت بعدها لماستغرب هذا وسط حالة الجهل و التخلف و ادعاء التدين السائدة الآن . دا كلامك بس اللى فعلا محتاجه منك انى اعرفه هو ايهالثلاثى المرح" الجهل والتخلف وادعاء التدين" طبعاً من وجه نظركم؟!!وبعدين انتاكمثقف عملت ايه علشان تغير فى الثلاثى السابق؟..اتصور ايضاً ان مرحله التكفيردى صعبه جداً ولا يصل اليها الا من وصل بيهم الامر الى طريق الاعوده فالرسول قال "فلقد باء بها احدهما" ...تعليقكم
أهلا ً بيك يا أحمد . سأبدأ ردي من حيث إنتهت أسئلتك . نعم أوافقك الرأي أن مرحلة التكفير هذه صعبة جدا ً و مؤلمة لأن هذه الثقافة حين تسود مجتمع ما فهي دليل ضعفه و عجزه و إبتعاده عن مناقشة القضايا الكبري بايجابية و إنصرافه إلي فرعيات هي في حقيقة الأمر لن تقدم أو تؤخر في قليل أو كثير . إنك حين تُعطي نفسك الحق في أن تكفر إنسانا ً لمجرد إختلافه عنك و عدم رضاه أن يكون دائرا ً في فلكك فهذا معناه أنك تنظر إلي نفسك علي إنك محور هذا الكون و دون أن تدري تكون قدر رفعت نفسك إلي مرتبة الإله الذي يعلم ما يظهر و ما يبطن . قل مثلا ً عن فلان أنه كافر . ماذا سيفيدك هذا . ربما هذا الكافر إن كان حقا ً كافرا ً يهتدي يوم و يكون من أكثر المدافعين عن الدين . كما أن الثلاثي الجهل و التخلف و ادعاء التدين الزائف ليسوا علي الإطلاق ثلاثي مرح بل هم ثلاثي وقح و ردئ أكثر درجات الرداءة . إن الجهل في بلادنا حالة عامة ، و هو الأساس . الناس لا تقرأ و هذه حقيقة . مصادر معرفتهم هي ثقافة سماعية فيما يمكن أن نطلق عليه ثقافة الكاسيت أو الأم بي ثري أو فور ...إلخ و هي ثقافة سطحية تبتعد كثيرا ً جدا ً عن الموضوعية . إذ أن المعلومات الواردة فيها هي انتقائية و موجهة . بينما الأساس في الثقافة أن تكون تجربة ذاتية تعتمد علي عقل المتلقي الناقد حتي يكون هو بنفسه و لنفسه مواقف و اتجاهات تكون منطلقا له في سبيل تعامله مع حياته و واقعه . و حين يسود الجهل فأنت تكون أمام حالة من التخلف و التردي فترفض كل جديد و تتعامل معه بمبدأ الشك و الريبة و الإبتعاد أو الخوف فتنعزل عن واقعك حتي لو لبست أحدث الموديلات و ركبت أفخم السيارات و تعاملت مع متطلبات الحداثة كلها لكنك في النهاية مجرد مفعول به . التخلف باختصار يعني أن تكون مجرد مفعول به و يعطلك علي أن تكون الفاعل هو أنك حين تتعاطي مع واقعك تتعامل بعقلية الماضي . بمعني انك تريد ان تستحضر نموذج الماضي بأكمله إلي الحاضر . و ادعاء التدين الزائف المقصود به أن من المفترض حين تريد أن تستمسك بدينك هو أن تحسن من أخلاقك و ترتفع بها حتي تسمو عن الدنايا و عن أمراض القلوب و ليس كما يفهم الكثيرين التدين علي انه مجرد مظهر خارجي . فكل تدين لا يُحسن من تعاملات صاحبه – في رأيي – ليس تدين . مثلا ً : كيف يدعي شخص التدين . و هو يمارس الغيبة و النميمة و حق اصدار الاحكام علي الناس حدسا ً دون يقين . و كيف يأخذ منك موقف و لا يريد أن يمد اليك يده بالسلام لكنه حين يحتاج اليك يتملقك و ينظر اليك راجيا ان تساعده علي الغش في الامتحان . إن كانت امثلة بسيطة كهذه لا تتعارض مع صحيح التدين فأنا أعتذر مقدما ً لكل من يدعون التدين .أما ما الذي فعلته لاحارب هذا الثالوث فأقول أن المشوار لا يزال طويلا ً و المعركة جد صعبة و المسألة لا تحتاج إلي مثقف أو غير مثقف لمحاربة هذا الثالوث بل هي تتطلب وعيا ً جماعيا ً بأخطار هذا الثالوث . فيكون دور المثقف في هذه الحالة أن يكون محرضا َ للناس بالفكرة و الكلمة و الفعل . المثقفون قلة . و ليس كلهم مهممون بهذه القضية . و ليس كلهم من يحارب فيها بكل طاقته . لكن المطلوب منهم – بعيدا ً عن كونهم مثقفين من عدمه – و المطلوب من غيرهم أن يكون كل واحد منهم إيجابيا ً في محيطه الأسري / العائلي – أو القبلي / محيط العمل .. و كل ما يتعامل معه . ايجابيا ً بمعني أن يصحح كلما سنحت له الفرصة من تفكير الناس و يرشدهم إلي الصواب . المعركة يا عزيزي صعبة جدا ً . و لن يحلها جهد فرد بل هي تحتاج لحل
جماعي . بقدر ما تتسع دائرة المؤيدين لثقافة التنوير بقدر ما يكون حسم المعركة أقرب
محمد حمدي الصياد
اهلا بيك محمد مجدى وكنت عايز اسالك سؤال عادى جدامن انت؟بالتفصيل
أهلا بيك يا محمد . أنا محمد مجدي . مواليد الاسكندرية . خريج أداب قسم التاريخ دفعة 2006 معرفش أتكلم عن نفسي أكتر من كدة . لو عندك عروسة لي مش حتعرف ساعتها تحصلني في الكلام
انتهت اسئلة الجمهور
- احمد زكريا من جديد -
موقف غريب مريت بيه . هو تكفيري الاسبوع الفائت . و ان كنت بعدها لم استغرب هذا وسط حالة الجهل و التخلف و ادعاء التدين السائدة الآن
- و أن يكون الناس أكثر تسامحا ً في تقبل المخالف لهم أو المختلف عنهم
آخر سؤال كدا ف السريع يابو حميد ..هما بيهاجموك من منطلق تدينهم الشديد ويأخذون عليك إنتفاخ عقلك من كثرة العلم في المقابل تقلص وتكلس الوازع الديني لديك .. وأنت تدين إدعاءهم المفرط في الدين وأنهم يمتكلون الوصاية على الشعب بمجرد إمتلاكهم لزمام الدين
قولنا بقى إنت ازاي بتتعامل معاهم مش المفروض انك توصل لحل وسط مانتم كدا دايرين ف حلقة مفرغة ومش هنخلص منها ..وانا شايف انك لسة ماوصلتش للتواصل معاهم بالشكل المطلوب ..اعتبر سؤالي نقطة انطلاق ليك جديدة في التعامل معاهم هتتعامل ازاي بقى؟
أشكرك جدا ً يا أحمد علي سؤالك و نصيحتك في وقت واحد . و للعلم فأنا حاولت الوصول معهم لحل وسط لكنهم لا يسمعون و لا يحاولون ان يصلوا الي نقاط مشتركة . و هذه عادة من يفتقرون الي التسامح الحقيقي
و احب اشكر الجمهور الرائع الذي اعطي للحلقة نكهة مميزة . و اتمني التوفيق لك و للبرنامج
شكرا
احمد زكريا
احب أقول في النهاية ان البرنامج بدأ بداية قوية مش عشاني انا والله بالعكس لأني فعلا عرفت أختار الإنسان المناسب في المكان المناسب في الوقت المناسب وهو أول حلقة للبرنامج ..بيعجبني فيك حاجات كتيرة اوي اولا لغتك وسردك الرائعين جدااااااااااااااااااااااااااااااااااااااااااااا..وفكرك طبعا وثقتك من نفسك القوية وعدم إستعجالك النجاح بالعكس انت اديتني نموذج رائع على الحفاظ على طريق الوصول للنجاح إلى جانب انك ماجنتش على نفسك وحافظت على نفسك وكرامتك ودا بيتجلى من خلال مثال عملك في ليبيا
وأحب أشكر الجمهور الرائع الجميل دا اللي خللى للبرنامج حضور قوي وتفاعلية شديدة نتمناها دوما في اعلامنا المصري عشان نرتقي بيه ونخليه في القمة زي ماكان.
و لنا عودة
-3-
هختم الحلقة بالشكر ليكم جميعا على دعمكم واخص بالشكر محمد حمدي الصياد انه زودني ببعض الافكار الحلوة عن صبانا واللي ساهمت ف خروج الحلقة ..واخيرا احب اقولكم على تجربة مريت بيها شخصيا ..وانا في سنة تانية صحافة كنت بدرب في جريدة صوت الأمة محرر في قسم الحوادث ورحت قسم الخانكة وجبت خبر كدا غريب اوي وهو ماتنشرش على فكرة ..ولد كان بيكره ابوه ودايما معارضه وخناقات يوم من بعد يوم وشتيمة واهانة في والده وفي يوم كدا مرة واحدة جري على المطبخ وجاب سكينة يضرب بيها ابوه اخوه هجم عليه وفاجؤه وانتزع من السكينة ونزل عليه 45 طعنة في مكان واحد تقريبا وهو منطقة الصدر ..إبن من فرط كرهه لابيه كاد يقتله وابن من فرط حبه لابيه قتل أخيه !!للدرجة دي ساءت العلاقة بين الآباء والـأبناء للدرجة دي بنكره وللدرجة دي بيوصلنا حبنا ..هو في ايه بالظبط احنا ليه مفرطين في الحب دايما ومتطرفين في الكره دايما فين الحلول الوسط فين العقل فين الدين فين الاخلاق ..وقبل ماختم اقولكم ان الخبر دا ماتنشرش لان رئيس القسم قالي والواد اللي اضرب 45 طعنة مات ولا لسة عايش قلتله 45 طعنة يا أستاذ قالي مات ولا لأ سؤالي واضح قلتله نسيت اسأل الظابط قالي يلا غور من وشي
