أخلاق السواقين

امبارح حصل معايا انا و واحد صاحبي موقف ابن حلال جدا ً
امبارح كنت مستعجل اوي علي الرجوع للبيت عشان مقدرش اصبر علي بعاد مدونتي الحبيبة
كنت عاوز ارجع قبل الساعة 2 باليل
المهم طالعين انا و صاحبي من شارع جانبي علي الشارع الرئيسي و اتفاجأنا بسواق تويوتا - ميكروباص - بيطلب مننا نساعده
عاوز يعرف مننا اصحاب العربية الحمرا و العربية الزرقا يبقوا مين عشان الطريق ده ضيق و سد و هو دخل فيه بالغلط و مش عاوز يتحمل اجرة اليوم لو معرفش يطلع بالعربية لانه معهوش مارشدير

الساعة كانت ساعتها واحدة و عشرة .

المهم قعدنا نخبط علي بابا العمارة و ننده ان حد يرد ابدا مفيش
و زهقنا بقي قلنا خلاص احنا نزق العربية رغم ان في ممطلع شكله غبي جدا
بس يا عم احنا نزقوا بقي و نجيب ناس تزق معانا
المهم زقينا و جبنا ناس و ناس كتير بصراحة جت و ناس اكتر رفضت .

لكن حل الزق فشل . قلنا خلاص نجيب عربية من بتاعت طلع الدبابة يا علي بدفورد - نص نقل يعني تشد العربية بسلبة و امرنا لله

وقفنا ساعة ان عربة تقف مفيش
ان سواق زميل يرضي ابدا
الراجل صعب علينا و ضرب كف بكف و شوية و حيعيط

دا انا و الله علي طول اي حد اشوفه في زنقة اسيب شغلي و اساعده

الراجل صعب علينا و قلنا ايه الناس بقت كدة وحشة ليه محدش ليه راضي يساعد الراجل الطيب ده الغلبان رغم انه
مستعد يدفع اي حاجة يطلبوها منه
المهم قلت له بص يا عم اقف انت علي الطرق من النحية التانية و احنا هنا سمع الراجل الكلام
و نفس الحكاية محدش راضي لدرجة انه اتشعلق في عربية نقل و نفس الكلام

المهم صاحبي لقي واحد جاره معاه عربيته النص نقل و فاضية قالي بكل عنتزة خلاص اتحلت الراجل ده جاري و مش حيرفض و كان حينادي للسواق بتاع التويتا قل حتي ما يكلم جاره
و كلم صاحبي جاره و رفض رفض قاطع لدرجة اني شكيت ان صاحبي ناصب علي الراجل ده

المهم نجحت مجهوداتي في اقناع سواق بمساعدة الراجل ده و صاحبي قاعد يغريه يا عم متخافشي اللي عاوزه حتاخده كأنه حيحسابه من جيب ابوه مع ان صاحبي ده بالذاذت دايما علي الحميد المجيد .

و انضف ما فيه جيوبه

و شدينا العربية بسلبة سواق التويتا صاحب المشكلة و طلعت سلبة خايبة عبيطة اتقطعت بسرعة
المهم قعد سواق التويتا يتحايل علي سواق النص نقل انه يستعمل سلبته لدرجة انه قاله يا عم تنزل معايا دلوقتي و اديلك سلبة احسن من دي بس طلعني و اللي انت عاوزه

المهم العربية و هي طلعة ع المطلع خبطت في عربية كلت جنبها كله

سواق التويتا وشه للاتجاه العكسي و التاني وشه للاتجاه الصح
قوم ايه صاحبنا بيقولي اجيله كام خمسة كويس صح قلت له و الله يا عم دي حاجة بينكم

المهم ركب عربيته و قال للسواق استناني اعدل نفسي و احاسبك
التاني استناه و احبنا ذهب بلا رجعة

خلاني انا و صاحبي ندمنا اننا قعدنا معاه ساعة و نص
دا حتي قبل ميخلع مقلناش شكرا