في كلام غريب ... في حياتنا بنستعمله .. تحس و انتا بتسمعه ..ان في لخبطة في دماغك ... و ممكن جدا ً تعتبرها جمل هبلة أو عبيطة .. و ان اللي بيقولها شارب حاجة مثلا لونها أصفر .. من الكلام ده .. حد يقولك .. أصلي سرقت نفسي ... و فلان سرق نفسه .. انا اول ما باسمع كدة باقول ....ده زي الفيل اللي مشي ع الحيطة بتاع عادل الفار .لكن طبعا ً قعدت افكر .. لحد موصلت للنتيجة المذهلة .. لحل المعضلة الخنقة دي ... و هو ان سرقت نفسك دي .. معانيها كتير جدا ً... ممكن مثلا سرقت نفسك .. يكون معناها ... نجزت ... او عملت حاجة يعني في وقت قياسي .. و ممكن يكون معناها .. التاني .. انك خلصت نفسك من مشكلة ما .. و ممكن يكون معناها ... بقي لو انتا بتحب .. انك سرقت نفسك .. و فضيت نفسك و قضيت ساعة بقرب الحبيب .. بعيدا ً عن كلاكيع الدنيا ...انا بقي سرقت نفسي .. كتير ... جدا ً... و لكن في الآخر غالبا ً.. كنت باخد فوق دماغي ..و بعيد عنكم .. دماغي .. وجعتني جدا ً.. لحد ما طلعلي " كالو كبير .. زي بتاع .. الفيلم الابيض و الاسود .. اياه .. اللي مش فاكر .. اسمه ايه .. بسبب الزهايمر اللي جالي .. بسبب كتر الضرب ... اللي خدته المسكينة ..سرقت نفسي .. مرة ...و نشفت دماغي و اصريت ان انا مدخلش كلية حربية اللي والدي كان عوزني اخشها غصبن .. عني .. و لاني برج اسد ... و ده برج فظيع .. و مريع .. و بشع .. جدا ً و عندي بشكل يعقد ... و قراراتي لازم اخدها من نفسي ... و مش بحب القيود ... فطبيعتي ... متقبلش ان حد ... يديني اوامر .. بشكل مستفز .. و يمشيني علي هواه .. عمال علي بطال .. فعملت خدعة ...اثناء الكشف الطبي .. الدكتور يقولي في كشف النظر .. هاه العلامة دي .. لفوق و لا تحت .. اقوله دي .. يمين ..يقولي و ده كبيرة و لا صغيرة.. اقوله .. مش شايف ... حاجة اصلا ً... و اسفرت هذه الجهود المضنية ... عن نجاحي .. و الحمد لله سرقت نفسي .. من مستقبل ... لمهنة مش حلاقي فيها نفسي ... و لكن في ظل حكم العسكر بتراودني نوبات ندم .. كان زماني دلوقتي .. في طريقي اكون كمان 20 او 30 سنة رئيس جمهورية .. خاصة مع احتمال قيام اي انقلاب عسكري نبقي نسميه ثورة بعد كدة ..و سرقت نفسي .. مرة .. كنت مع مجموعة من صحابي .. كابوريا .. و عوض و سامي بن ممدوح القاهري .. و كنا اذ ذاك .. وقتها يعني .. في العيد الكبير .. و حدث ان قام رفقاء السوء .. و الصحبة الاشرار .. بمعاكسة بنات .. يخلوا العيون غصبن عنها مفنجلة .. و يجبروها علي التأمل الموضوعي .. و اللاموضوعي .. و اه يا عيني من التأمل .. و مشينا .. مشينا .. وراهم .. و اصحابي .. بيقولوا افيهات ايه ... زي العسل ... و البنات اخر استجابة ... و ضحك بقي .. و حاجات تخلينا نصدق نفسنا اننا .. خلاص .. وصلنا لهدفنا ... و دخلوا في حارة .. ضيقة ... و دخلنا وراهم ... تداعبنا أحلام التلاقي و الوصال ..و مرة واحدة طلع عيل صغير طوله شبر و نص .. حاول يكعبل ..اطول واحد في صحابي كابوريا .. و قاله ( الولة الصغير هو اللي قال ) امشي يلة يا اما حقطعك .. ضحكنا من المنظر و قبل ما نكمل ضحك .. لاقينا امة لا اله الا الله ملمومة علينا و محوطانا .... من كل جيهة .. و اللي ما يشتري يتفرج .. كاننا كنا وجبة في بوفيه مفتوح .. العبد الغلبان غلبان اساسا ملوش لا في ضرب و لا في عراك .. لقيت نفسي مرة واحدة ... و انا ماسك الموبيل في ايدي .. عشان كنت فرحان بيه .. و اول مرة امسك موبيل .. بضرب اي حد ييجي .. بكيعان ايدي بس .. و الناس تقع .. عن يمنيني و عن شمالي و من امامي و من خلفي .. كنت و لا عنترة يومها .. و لأن الجري نص الجدعنة ... فطلعنا نجري ... و نجري ... في شوارع جانبية ... اسفرت المعركة في النهاية .. عن مطاردات منهم لينا حتي البحر .. و حصارنا بالموتوسيكلات و المطاوي .. و لكن ربنا شخص لينا واحد بن حلال .. كان مرة معدي ادام دكان صاحبنا بن عوض .. البقال .. و اشتري منه سجاير فرت .. فخلصنا الراجل منهم ...انا بقي سرقت نفسي في الموقف ده باني جريت ... و اكتشفت .. اني موهوب جدا ً,, في العدو مسافات طويلة ...و خسرت .. ساعتها .. ان هدومي اتوسخت ....الموقف التالت اللي انا فاكر اني سرقت نفسي فيه .... هو اول علاقة ليا بامتحان كميا ... و كان امتحان شهر .. و كان أستاذ حكمت (راجل متنكر في زي ست .. بنقاب ... و صوتها خشن اجش ..و نظراتها حادة كالالمان ) في الامتحان ده غشيت .. و كانت اول مرة اغش ...عشان انا معرفتي بالكميا زي .. معرفتي بالسنسكريني .. بالظبط .. و الحمد لله علي كل حال .. جت بطلعتها البهية .. في حصة الانجليزي .. و ندهت عليا .. و قالت .. فين محمد مجدي .. انا افتكرت اني طلعت الاول .. قالت شاطر .. ضحكت ضحكة عبيطة .. قالت .. ايه الذكاء ده .. نص من عشرة ...متهيألي كفاية كدة .... انهاردة .....و شقتوا بقي ان ممكن اوي الواحد يسرق نفسه .. بس ممكن بردو يدفع التمن .... صحيح ... من قتل يقتل و لو بعد حين
ليست هناك تعليقات:
إرسال تعليق