انهاردة في كورس الكمبيوتر حصل حوار غريب . زميل لي كلمني بكل صراحة عبر لي عن رايه فيا . و بالتأكيد ده نفس الرأي بتاع باقي زمايلي اللي في الكورس . كلمني و قالي بصراحة انا مكنتش متوقع انك كدة ؟
كدة ازاي يعني ؟-
يعني كنت واخد عنك فكرة احسن من كدة
مش فاهم ؟ فاهمني قصدك ايه ؟
يعني انك ضال عن الطريق القويم طريق الحق
انا ضال ؟
ايوة . و بلهجة عصبية بقي " انتا ضال " و بينطبق عليك حاجة في الدين . للاسف بتنطبق عليك .
ايه هي بقي الحاجة اللي للاسف دي ؟
بلهجة كانه من فوق منبر جامع في صلاة جمعة من خطيب متشدد زي بتوع افلام عادل امام " بين الصلاة عمود الدين من اقامها اقام الدين و من تركها ... يبص لي بنظرات قوية و بنبرة صوت اعلي .... ترك الدييييييين " -و يكمل بحديث اخر " بين الرجل و الكفر " نفس النظرة " ترك الصلاة "
- قلت له اه انتا قصدك علي كدة يعني يعني انتا شايفني كافر ؟
ايوة انت منحرف عن الطرق القويم و المفروض اننا ندعوك للصلاة ثلاثة مرات و اذا لم تلبي الدعوة تقتل .
قلت له ايه
تقتل
قلت له و مين بقي حيقتلني انشاء الله ؟ انت و لا شيخ من شيوخك ؟
بصلي بحسرة قال مش حد ما هي الشريعة معطلة للاسف
قلت له يا ابني الكلام اللي بتقوله ده غلط ده كلام ناس مش فاهمة كمان انت اش عرفك بيا خارج الكورس .
انا مش باصلي هنا بس و رغم اني عارف ان ده غلط بس انا واخدها عند
قالي عند بتعاند ربنا ؟
قلت لا بعاند فكر غلط شايفه مش مقتنع بيه و ....
قالي فكر ايه اللي يمنعك عن الصلاة ...
قلت له الفكر اللي يخليك انت و غيرك تتكلموا بالشكل ده و تتغروا بنفسكم بالغلط
المهم زميلنا مصر علي كدة . و انا اتعودت لما الاقي حد قافل عقله و قلبه و مش عاوز لا يسمع و لا يفهم اسيبه لان مفيش منه رجا
انا مش بصلي في الكورس لان انا مقتنع بفكرة ان الكورس عدد ساعاته محدود و كان حسب نظام البريك الاولاني بيضيع اكتر من نص الوقت في البريك و الصلاة . و انا مقتنع جدا بعيدا عن اراء الشيخ فلان او علان ان لما نكون في حلقة علم يبقي الاولوية للعلم .
الكلام ده مش كلام في الهوا . انا ليا اصحاب من الاخوان المسلمين و كنت شغال مع اخوان و كنا بنعمل كدة . لان الدين عباداته مش مقتصرة علي الصلاة و الصوم و بس بل انه في الحقيقة كل ما يفيد الانسان يعتبر عبادة . لان الدين ده هو دين الانسان .
و بعد ما اتعدل نظام البريك فعدم صلاتي معاهم لاني ضد اي شكل من اشكال فرض وصايا من اي نوع عليا . و ان اي حد فكره وهابي متآمر يكسب مني اي جولة . المشكلة ان اي واحد ضرب لي دقن و مسك مصحف و استعمل سواك و سمع له شريطين و حفظ له كم اية و كم حديث بيعين نفسه وصي علي الدين و مش حنسي ابدا في شغلي الاخير الاتنين الوهابيين اللي سمحوا لنفسهم بتكفير واحد ملتحي زيهم . شفتم بقي ان التكفير عند الفكر ده منهجية و انهم بيعينوا من انفسهم اوصياء علي البشر و بياخدهم الغرور بالدين زورا و جهلا انهم يستعلوا علي الناس و يفتكروا نفسهم اعلي منهم و اقرب الي الله .
مع ان الايمان الصحيح مش من المفترض ان يصل فيه الانسان لهذه الثقة التامة . يقول ابن تيمية - و هو احد مراجعهم الكبيرة - نقلا عن اخرين " ان العبد ليقوم بالذنب فيدخل به الجنة و يقوم بعمل الخير فيدخل به النار " و السبب انه اللي عمل ذنب يفضل يستغفر لحد ما يغفر له ربنا اما اللي عمل الخير فممكن لما يصيبه الغرور يقول ما اصل انا بطلع زكا او انا بصلي الوقت بوقته او انا باؤمر الناس بالمعروف و انهيهم عن المنكر .
واحد تاني قالي و احنا ماشيين بخفة دم بايخة - وريني بطاقتك كدة عاوز اتأكد انت مسلم و لا ايه بالظبط ؟
قلت له ليه انت مين ؟
قال لي انا احسن منك ؟
قلت له لا
قال لي لا انا احسن منك
قلت لا بيتهيألك
قالي لا انا احسن منك
قلت له الله اعلم بالموضوع ده مني و منك
قريب جدا باذن الله حعمل مقال افند فيه افكارهم الخطأ اعتمادا علي كتب من التراث الاسلامي
و حسبي الله و نعم الوكيل
ليست هناك تعليقات:
إرسال تعليق