انتهي كورس ال ICDL

يوم الاتنين 27/8/2007 انتهي كورس ال آي سي دي إل .
اللي ابتدا يوم 10/6/2007

الكورس ده انا باعتبره من الاشياء الصح اللي عملتها من فترة كبيرة جدا ً.

و الكورس ده له معايا ذكريات جميلة جدا ً . و بعض الذكريات اللي مش جميلة اكيد و مش حقدر انساها طول حياتي لانها كانت شئ مفاجئ بالنسبة لي طبعا من الحاجات دي مسألة تكفيري .

في الكورس ده . جذبني جدا اسلوب التعليم اللي بيعتمد علي المشاركة و الحوار و التفاعل الايجابي بين المُحاضر و الطلاب بعيد عن الاساليب التقليدية العقيمة اياها و عرفت الفرق بينهم اد ايه كبير .
يمكن الاحساس ده مش مجرد احساس مني و بس . لأ ده يمكن يكون هو كمان احساس زمايلي . و الدليل اننا كنا لازقين في كراسينا مش هاين علينا نمشي و زعلانين ان الكورس انتهي .

المُحاضر نفسه أ محمد حسن . خلوق جدا ً و متحضر لابعد مدي . عرفني ان لسة في اخلاق في البلد دي .
مدام كوثر . ست ب 100 راجل اتعلمت منها الطموح و المسؤلية و البساطة . لدرجة اني كتبت عنها مقالة اتنشرت في شبابيك و حنشرها هنا بكرة باسم - مدام كوثر لك ِ التحية .
المقال اعجبها جدا و تأثرت بيه جدا لدرجة ان الدمعة فرت من عنيها
و اصرت علي انها لازم تطبعه كذا نسخة .

باقي زمايلي حوصفهم في كلمة او اقول انطباعي عنهم .

ابراهيم حسوبة : لا انكر نك شخصية ظريفة و لكن لا تتصدي لاشياء هي اكبر من ثقافتك .
وليد : او الشيخ وليد زي ما بيحبوا ينادوك بيه . اذا كان الاسلام من اهدافه الكبري تهذيب السلوك فليه يا عم
في الامتحان بتغش .
مصطفي : دماغك نضيفة بس عيبك انك بتحاول تهاود اي حد و ده غلط عليك فيما بعد .
عمرو : انت عمرو الطلخاوي و لست عمرو بن العاص .
شوقي : شكرا انك كفرتني جهارا ً و لم تعلم انك ارتكبت ذنب عظيم . انصحك بقراءة كتاب فتنة التكفير لشيخكم الالباني
عشان تعرف اد ايه انت غلط .
بيشوي :
بسبب دفاعي عنك في اول ايام الكورس لما حبوا يتريقوا عليك عشان انت مسيحي خدوا موقف مني . لكن لما عرفتك اكتر مزعلتش من موقفهم مني لان فعلا الانسان الكويس كويس بغض النظر عن ايه دينه .

مجموعة بنات كلية التربية
دينا هدير نهي مني يمني

انتم بنات محترمين فعلا ً و ولاد ناس و مش بنات هايفين
فرحت جدا ان لسة في بنات زيكم عندهم شعور حلو نحية الناس المحتاجة
علشان كدة اشتركتوا في اسرة رسالة
معرفتش اسلم عليكم اخر يوم لاني كنت مشغول بالبطاقة اللي ضاعت مني

انا عارف مفيش حد من توع الكورس حيقرا الكلام ده .
بس انا يعني عامل ليه خانة اسمها يومياتي .
عشان طبعا افضفض و اقول اللي معرفتش اقوله او اللي كان نفسي اقوله او اللي قلته و مش عاوز انساه